About

من کہ احمد جاوید بیسویں صدی کی ساتویں دہائی میں شمالی بہارکے میتھلی خطہ کے ایک متوسط کاشتکار کے گھرپیداہوا۔وہیں پلا بڑھا جوان ہوا،جتنی دنیا دیکھی وہیں سے دیکھی،وہیں سے دیکھ رہاہے اورالحمدللہ ،اس کے اس عمل میں اب آپ بھی شریک ہیں۔
مِتھلا جو کبھی پورب کا یونان تھا،جوعہدعتیق کےشہرہ آفاق رشی(عالم و شارع) گوتم کی دھرتی ہے، جہاں سیتاپیدا ہوتی ہیں،جہاں پہنچ کر ویدانت کے مہاپنڈت شنکر کی عقل و منطق گم ہوجاتی ہے، جس کی پہچان مچھلی، جہاں کا پکوان مکھانا اور جس کا پرساد پان ہے۔ آم کے باغوں، جل تھل تالابوں، لہراتی ابلتی سرکش ندیوں، سرسبزو شاداب کھیتوں، اُرہل کے پھول اور تلسی کے پودوں سے گلزار ومعطراس باغ شیرین(مدھوبنی) سے بھلا کوئی کب نکلتا ہے۔کسی نے بالکل سچ کہا ہےکہ انسان کا اصل وطن اس کی زبان ہے اور وہ زندگی بھر وہیں رہتا ہے جہاں اس کا بچپن بیتا ہے۔
یہ حقیر کوئی البیرونی ،ابن بطوطہ یا کولمبس نہ تھا جو دہلی کی دریافت میں نکلتا لیکن ہندوستان کے متوسط طبقات کے عام تعلیم یافتہ نوجوانوں کی طرح اس کی زندگی بھی کسی کولمبس کی بادبانی کشتی تھی جو اسے موجوں کے سہارے اور ہواؤں کے رخ پر لیے لیے پھرتی ہے ، پھرکہیں ڈوب جاتی ہے یاکسی ایسے کنارے جا لگتی ہے جو اس کے خواب و خیال میں بھی نہیں ہوتامگر اس کا ہرسوارکولمبس نہیں ہوتا جس کی خوش قسمتی اس کے قدموں میں کوئی نئی دنیاڈال دیتی ہے۔جہاں تک میرا تعلق ہے، کسی نئی دنیا کی کوئی طلب تھی نہ جستجو،فارسی پڑھنا، میتھلی بولنا، سنسکرت سیکھنا، کاشتکاری کرنا اور گاؤں کی تعلیم وترقی کے لیے وقت لگاناچاہتا تھالیکن اردو نے ،جوماں کی لوریوں کے ساتھ وجود کا حصہ بن گئی تھی ،لاکر دہلی اور صحافت میں رکھ دیا،دونوںتضادات کی دنیا تھی، فلک شگاف عمارتوں کے سایے میں کچی گندی بستیوں کی دنیا۔
دہلی دکن کی طرح کبھی ترہت گئی نہ کسی برہان الملک نے اودھ کی طرح اس کو سینچا سنوارا، پھربھی زندگی کے قدرتی رنگوں سے مالامال اس سرسبزو شاداب سرزمیں پر گنگا جمنا کے دھارے کی صورت میتھلی اور اردو کی بستیاں اپنی اپنی بہاریں دکھاتی ہیں۔ اس کی فضا ودیاپتی، دنکر اورناگارجن کے نغموں سے سرشار ہےتو یہاں کی بزمیںحافظ و سعدی، رومی و جامی، خسرووبیدل،جائسی و جوہری، کبیرونظیر،میرو غالب، داغ و شاد ، اقبال و جگر،جمیل و پرویز ، فیض و فراق اور مہرومظہر کے زمزموں سےمشک بار۔ گاؤں کاشتکاروں کا تھا جہاں گڑ اور مکھانےکی گھریلو صنعتیں اوراطراف میں واقع شکر کی ملیں لوگوں کی زندگی میں مٹھاس گھولتی تھیںلیکن کئی خاندانوں میں پڑھنے لکھنے کی روایت بھی چلی آتی تھی۔ شیخ محمد عیسیٰ فریدی اور ام الخیر اسلام النسا کی خواہش تھی کہ وہ اپنے بچوں کو فارسی پڑھائیں اوروہ بڑے ہوکر اپنے نانا مولوی محمدمیاں نورحسنؒ کی طرح مثنوی کے اشعار و حکایات سنائیں،حافظ و جامی کےاشعار پڑھیں،وعظ کہیںاور عشق و عرفان میں ڈوبی ہوئی باتیں کریں۔ گاؤںکے گورنمنٹ اردو مکتب(کوٹھیا) میں دوٹیچر تھےماسٹرعبدالمجید(مرحوم) اور محترمہ زبیدہ خاتون ۔ اباجی نےحافظ محمد سلطان کی خدمات الگ حاصل کیں جو بڑے باکرامت معلم اورایک ولی صفات انسان تھے۔ ابھی پڑھنا لکھنا آیانہ تھا کہ فارسی سیکھنےکو مدھوبنی کے محلہ مصری گنج (کوتوالی چوک)بھیجنےلگے جہاں حافظ ذاکر حسین رہتے تھے،پرائمری اسکول کے ٹیچر مگر پرانے فارسی داں ۔ یہی فارسی اسےمتھلا یونیورسٹی سے گریجویشن کے بعدعمر کی چوبیسویں بہار میں دہلی کھینچ لائی۔
میتھلی زبان و ثقافت کی مٹھاس میں رچی بسی اردو کے اس فرزند کی نشوونما دادی کے قصے کہانیوں کی فضا میں ہوئی تھی۔ اس پر مستزاد تاریخ ونفسیات اور فارسی کا طالب علم ٹھہرا۔ سو، اب بات بات میں قصے سناتا،حکایات لے بیٹھتا اور ہرواقعہ میں کوئی کہانی ڈھونڈ لیتا ہے۔ دلّی جو آتاہے جانا کہاںچاہتا ، عالم میں انتخاب اس شہرکو اسی روش نے اتنا گنجان اور ناقابل رہائش بنادیا ہےکہ سانس لینا تک دشوار ہے۔یہاں کے پشتینی باشندوں میں جس کو دیکھیے وہی اس دکھ میں مبتلا ملےگا کہ میاں دہلی اب دہلی کہاں رہی، جانے کہاں کہاں سے آجاتے ہیں اور میروغالب کےاس شہر کو خراب کرتے ہیں ’رہتے تھے منتخب ہی جہاں روزگار کے‘ حالانکہ یہ دونوں منتخب روزگار بھی اکبرآباد سے یہاں آبسے تھے۔ یہاں کے ادبا و شعرا تو دہلی کی بربادی کا ماتم اور اس کے بننے بگڑنے کا رونا ایسا روتے ہیںکہ جیسے یہ دہلی کے ساتھ کچھ خاص ہے، دنیا کے کسی اور شہر میں شاید ایسا کبھی نہیں ہوا، بغداد و شیراز کبھی نہیں لٹے، لندن اور پیرس کو انقلابات نے کچھ بھی خراب نہیں کیا لیکن میرے حصے میںجو دہلی آئی ، اس میںبہ مشکل ہی کوئی رہ گیا تھا جو شاہجہان آباد کی فصیل کے اندر پیدا ہونے پر فخر یا اس کی درگورخوبیوں اور درکتاب عظمتوں کو یاد کرتا۔ اب تو اچھے خاصے دہلی والے جنوبی دہلی کی نئی کالونیوں کو للچائی نظروں سے دیکھتے، پرانی دلّی نہ چھوڑنے پر پچھتاتےاور خدا نے نوازا ہےتو یہاں سے منتقل ہوجاتے اور رٹارٹایاجملہ زبانوں پر ہوتا ’میاں! میرے سارے دوست اور پڑوسی پہلے ہی ادھر آگئے تھے، میںنے بھی سوچا کیوں نہ نیو فرینڈس کالونی یا مہارانی باغ آبسوں‘۔ اب کوئی استاد رساؔ تھوڑی تھےجو دہلی کےتاریخی دروازوں سے باہرکے لوگوں کو ’فارن کنٹری کا‘(بدیسی) کہتے اور باہر والا کہلانے کے خوف سے یہ یہاں سے نہ نکلتے ۔
دلّی والوں کے روزمرہ میں کسی کو اب باہر والا کہہ دیناکوئی حقارت سی حقارت نہیں رہ گئی تھی، ان کے محاورے میں باہری کی جگہ اب بہاری نے لے لی تھی لیکن وہ اندر ہی اندر ان بہاریوں اورپوربیوں سے شرمندہ شرمندہ سے رہتےتھے جو دھلی دھلائی اردو بولتے۔یہ بےچارے اپنی جھینپ ان سے یہ کہہ کر مٹاتے تھے ’نہیں تم بہاری نہیں ہوسکتے، لکھنؤ کے ہوگے‘۔یاد آتا ہے کہ اردوکے ایک بڑے صحافی،ادیب اورایک ہفت روزہ اخبار کے ایڈیٹر کو ان کے ایک رفیق کار نےدوسرے رفیق کارکےتعلق سے باخبرکیا’ بہاری ہے‘،یہی بات جب اس نے ان سے دوچار بار کہی تووہ ایک دن ابل پڑے ’سنیے! میں بھی بہاری ہوں، میراباپ بھی بہار ی ہے، میرا دادا بھی بہاری تھا ‘ اور اب وہ ان سےکہہ رہا تھا ’ نہیں نہیں، خداکی قسم، آپ بہاری نہیں ہوسکتے‘۔
دلّی والےاب بھی اپنی رفتارو گفتار سے پہچانے جاتے تھے لیکن کسی سے کوئی ایسی ویسی حرکت سرزد ہوجائے تو چونکتے تھےنہ کہتے تھے ’ جانے دو، باہر والے ہیں‘، اب تو خود ان کو سننا پڑتا تھا ’دلی چھ کا ہے‘۔ جامعہ نگرکے بساطی تک ان سے کہتے تھے ’بی بی! پرانی دلّی سے آئی ہو،یہ ساؤتھ دلّی ہے ساؤتھ دلّی، یہاں چیزیں اتنی سستی نہیں ہیں‘۔ شاہجہان آبادکے گلی کوچے اب اور باتوں سے زیادہ روایتی اشیا اور سستے مصنوعات و ملبوسات کے لیےکشش رکھتے تھے۔لال قلعہ کے پیچھے پرانی چیزوں کا بازار، لال قلعہ کے سامنے چاندنی چوک اور جامع مسجدکی سیڑھیوںتک نئےپرانے کپڑے جوتے اور دریاگنج کے صراط معلق (ہینگنگ بریج) سے دلّی گیٹ تک پرانی کتابوں کی پٹریاں اب یہاں کی پہچان تھیں۔ ہر اتوارکو اورچھٹی کے دوسرے دنوں میں اوکھلا ،سیلم پور اور شہرکے دور دراز علاقوں سے لوگوں کی بھیڑ جامع مسجد، چاندنی چوک اور صدر کے بازاروں میں امنڈ پڑتی تھی اور یہاں کے دکاندار، کاریگر اور بساطی اس کے لیے پورب کے باشندوں کے جامع مسجد لال قلعہ سے عقیدت مندانہ جذباتی لگاؤکےگرانبارِ احسان تھے ۔سید ضمیر حسن دہلوی نے لکھا اوربالکل سچ لکھاکہ’وہ دِلّی والے جو خاک نشینی میں کج کلاہی اور فقیری میں شاہی کیا کرتے تھے یا تواللہ کو پیارے ہوگئے یا بٹوارے کی افرا تفری میں دیس چھوڑ بدیس جابسے‘‘ اور ’’ اب دلّی والوں کی خوبیاں درگور و در کتاب ہیں، جس کے دیدے روشن ہیں وہ دیکھتا سمجھتا اور تسلیم کرتا ہے، جس کے پھوٹ گئے وہ بھلا کیوں ان دیکھی باتوں پر ایمان لائےگا‘۔
دہلی آیا تویہاں رہنے کا معقول ٹھکانہ بھی تھا اورمضبوط جواز بھی لیکن اس دیہاتی کو دہلی راس نہ آئی۔ چار پانچ ماہ کی مختصرمدت میں اس لمبے چوڑے دور دور تک پھیلےشہر اور اس کی شیطان کی آنت جیسی گلیوں کو کتنا دیکھا سمجھا جاسکتاتھا مگر بعض اتفاقات نے دلّی کی دریافت میں اس اجنبی کی مدد کی، جس کا شکریہ ادا نہ کرنا اس کی ناسپاسی ہوگی۔ دوسری دفعہ کوئی پانچ سال بعد دوبارہ آیا تویہ ایک تاجر تھا اورپندرہ بیس دن کے سفر پر آیا تھامگر ایک اتفاق نےاسی مدت میںاس کی آنکھوں پر دہلی کی دریافت کے کئی دریچے کھولے اوراگریہ نہ ہوا ہوتا تو یہاں برسوں رہ کر بھی یہ شاید دہلی کو دریافت نہ کرپاتا۔ ادب و صحافت سےاس کا طویل شوقیہ لگاؤاسے تیسری بار یہاں کھینچ لایا اور اب اس کا اور دہلی کاکل ملاکر تیس بتیس سال کا ساتھ ہے۔ وہ دہلی کو چھوڑنا چاہتا تھا، ایک سال لکھنؤ جاکر رہا اور شکرہے کہ ایک ہی سال رہا،رہ جاتا تومیر کی طرح اجنبی مرتا یا یگانہ کی طرح خوار ہوتا،کئی سال سے پٹنہ میں ہے، آیا تھا تو یہیں بس جانے کا ارادہ رکھتا تھا لیکن دہلی اس سے چھوڑی نہ گئی، اس میں بس جو گئی ہے۔ دل والوں کی اس بستی کی جوبائیس خواجہ اوربے شمار درویشوں کی بستی ہے، کئی باتیں اس کےلیے پسندیدہ ہیںاور کئی سخت نا پسند لیکن دہلی تو پھر دہلی ہے۔یہاں کے روڑے مشہور ہیں، یہ اپنے روڑےپر ناز کرتی ہے،مزاج کااکھڑپن اسے خوب راس آتا ہے، جس کسی کو اپنا لیتی ہے آسانی سے کہاں چھوڑتی ۔ لکھنؤ جارہا تھا تو پروفیسر عبدالحق نے کہاتھا ’آپ کو جہاں جانا ہے، جائیں لیکن جو بچے یہیں پلے بڑھے ہیں ان کووہاں لے جانے کی غلطی ہرگز نہ کیجیےگا‘۔ لکھنؤ اور پھر پٹنہ میں رہ کر سمجھ آئی کہ بات کیاتھی۔
انسان کی یہ کمزوری بہت عام ہے۔وہ اپنے گردوپیش کےحسن اور اس کی قدرو منزلت آسانی سےمحسوس نہیں کرتا،یہاں تک کہ خود اپنےاندر کے جوہر کو دریافت کرنے میں بھی اکثر دیر کردیتا ہے۔آپ جہاں اور جس ماحول میں رچ بس جائیں وہاں یاتو آپ کوخوبیاں ہی خوبیاں نظرآتی ہیں یا پھر برائی ہی برائی دکھائی دیتی ہے۔ میرامسئلہ یہ ہے کہ اشیا ہوں یا اشخاص،جہاں تک ممکن ہوتاہے، ان سے لمحہ موجود میںبقدر ہمت حظ اٹھانا چاہتاہوں،اگلے وقتوں کے لیے اٹھا نہیں رکھتا۔ جو ہوگیاوہ ہوگیا،اس کا غم نہیں کھاتا، جو نہیں ہوااس کا بوجھ نہیں لیتا۔ خیام کا مرید سمجھ لیں، ٹالسٹائی کاچیلا کہہ لیں،کہنا ہوتوابی قوریونی کہیں ، شراب نہیں پیتا، حرام نہیں کھاتا اور دلوں کو نہیں دکھاتا۔جو، جیسااورجہاں ہے، اس کو اسی مقام اور اسی وقت میں حسن و قبح سب کے ساتھ قبول کرنےکاحوصلہ اپنے اندرپاتا ہوں۔ میں نے اس شہرمیں کیا دیکھا کیا پایا ، محفوظ کرنے کی اپنی سی کوشش کررہا ہوں۔یہ کام میں نےدہلی کی زندگی کے کچھ منتخب کرداروں کے سہارے کیا ہےاوراس کے علاوہ اپنی زندگی میں اور تھاہی کیا۔ یہ کردار اپنے اپنے دائرے کی معروف و مشہورشخصیتیں ہیں ، اردو لسانی معاشرے کے کردار ہیں،تاہم آپ اگر ادیب و دانشور ہیں اور علم و ادب کاوہی ذوق رکھتے ہیں جو آجکل ہمارے درمیان عام ہے تو آپ کو مایوسی ہوگی کیونکہ یہ بڑے ادیبوں، نامورسیاستدانوں اور دانشوروں کی زندگی میں جھانکنے اور ان کے اردگرد دلّی دیکھنےیا لال قلعہ اور قطب مینار دیکھنے دکھانے سے زیادہ میرےاپنے حصے کی دلّی ہے، ایک بڑاخاص لیکن بالکل عام سا،ہرلمحہ بنتابگڑتا،ایک بہت بکھرا بکھرالق و دق شہر۔
(’ میرے حصے کی دلّی اورقصہ چھٹے درویش کا‘ کے پیش لفظ سے اقتباس)